إذا كنت "مبرمج وبس"... فأنت بخطر حقيقي
ولا شركة بالدنيا عم تدفع راتبك كرمال تكتب كود وبس. الشركات عندها وجع رأس، مشكلة حقيقية، وعم تدور على شخص يعرف يفهمها ويحللها ويطلع بحل. الكود؟ هذا مجرد أداة. متل المفك أو الشاكوش بيد العامل. اليوم إنت بتكتب الكود بإيدك، بكرا AI بيقترح، بعد بكرا Tool بتولّد، وبعده شي جديد ما كنا متخيلينه أصلاً. الفكرة مو هون.
المشكلة الحقيقية لما الواحد يعرّف حاله إنو: "أنا coder وبس". ساعتها أي أداة جديدة بتصير تهديد، وأي تطور بيعمل قلق. بس لما تعريفك لنفسك يكون: "أنا مهندس، بفهم المشكلة قبل ما أفتح الـ IDE". هون القصة بتتغير.
قيمتك مو بعدد الأسطر، ولا بسرعة الكتابة، ولا بحفظ الـ syntax. قيمتك بعقلك… بالتحليل، بفهم البزنس، ببناء المنطق، وبإنك تعرف شو لازم ينعمل قبل ما تسأل: كيف نكتبه؟ الأدوات بتتغير، اللغات بتتغير، حتى طريقة كتابة الكود عم تتغير. بس المهندس الحقيقي؟ بيضل مطلوب… لأنو بيعرف يحل، مو بس يكتب.